فينك يا أحلى معاد؟

يا قفل كبير على بابى
بتمنع عنى أحبابى
بتحبسنى..
وتكتم فيّه أنفاسى
أنا المسجون لإحساسى
سؤال مُضنى.. لإمتى ايديك تكتفنى؟
* * *
تدق الساعه جوّه القلب
وبتمرّ الساعات أعوام
فى ليل السجن من غير ذنب
وباجرى بعينى ع الترابيس وع الأبواب
واقول ياما نفسى أبقى شباب
أشيل من تانى بلّوره.. من الحكايات
وضحك، آهات..
ميزان خطوات بيعدل بين قلوب الناس
* * *
أنا موظف بادور فى الساقيه من صغرى
تدوسنى نعالهم الغاليه.. شكيت ؟ عمرى!
ووقت ما شعرتين إبيضوا من شعرى..
يجينى الأمر اطلع بالمعاش بدرى!
* * *
تمرّ سنين وقفلى حديد..
يدوّبنى.. وهوّه شديد
متبّت فيّه مش حاسس
بكل ألم يبكينى.. فى صبح جديد
* * *
تمرّ سنين وقفلى واقف لى بالمرصاد..
وبكره الجاى.. يمنّينى بأحلى معاد
أشق كيانى لاجل افتح فى خمسين باب
ومن تانى..
تزورنى اللمّه والأصحاب
واقول ليهم " يامرحب انتو مش أغراب"

2005

أهديها لمسرح قصر ثقافة المنصورة الذى أغلق بابه فى يوليو2005 ، ثم فُتح بابه من جديد فى أغسطس 2008 بعد ترميم المبنى بأكمله .

نُشرت فى جريدة الرأى السنة 16 العدد 831 .