"منين ضى السعاده يهل" ؟
سؤال حاير ..
تملًي تقوله لي مرايتي..
وتجري الايد على المكياج ..
أحط أخضر على الوردى ..
فى نفسي أعمل ملامح تانيه غير وشى ..
عشان يمكن أتوه عنّى ..
ومعرفش باحس ساعات ..
بإن الغربه واخدانى بعيد منّى ..
واحس الحزن بيغيم سما الننى ..
ولكن غنوتى بتعلى فى ضى عيون مقابلنى ..
ويسخر منّي كام تمثال لناس فاضيه ..
ومانيش عايزه أكون تمثال ..
لكن نفسى..
فى كل الناس يبصوا لى بإنى مثال..
من الإنسان وأخلاقه ..
وأخاف ليكون جزاءه ف يوم ..
إهانه ْوضربه جايه له ورا ضهره ..
وبارفض أجيب حاجات ليّه ..
وأقدمها على جناح الموده لغيرى فى هديّه ..
فتبتسّم عنيه فيّه ..
وبامشى وْشايله جوّايا عطش أحلام
لأحضان أب غاب عنّي بقاله سنين ..
وقلبى لحضنه كله حنين ..
ورغم البعد ..
بالاقى عيونه حاضنانى فى عم سليم ..
بيهري نهاره لاجل يبيع علب مناديل ..
وأقابله ف قلب أستاذى ..
ْوعصايته الدافيه والقاسيه..
وأقابله ف قلب شاعر حى ..
وجوّه قصيده حلوه لاقيتها منسيه ..
* * *
يا قلبى اصبر على المكتوب ..
وحاول تبدر الضحكه ف قلوب الناس ..
وشيل فى إيديك شعاع الشمس ..
يزهّر فى القلوب الحس ...
No comments:
Post a Comment