من غيرك

جميل البحر من غيرَك ..
باسلم قلبى للموجه المعديّه ..
تاخدنى بْشوق وحنيّه
وباستغرب ..
ده كان البحر فى عيونَك ..
باشوفه غريق مالوش آخر ..
وكنت اسبح كريشه بتطحن جوّاه وبتكابر
وكان كرباج غضب ثاير..
بنفخه ْمعاها تأثيرَك
جميل البحرمن غيرَك
* * *
جميله السكه من غيرَك
باشوفها حقيقه أدّامى ..
وبكره اوصل لأحلامى ..
وكنت تشوفنى زى الطير فى صوته السحر
حبست الطير فى جوّه قفص ..
وحطيته فى عرض البحر ..
وظنيت عمره مايقدر يفك الأسر ..
لكن طيرك كسر قضبانك الهشه ..
ولو هايطير سنين وحده ..
ولا يرضى بْسراب عشه
ولا يرضى .. يكون ورقه ...
بيلعب بيها أمشيرَك
جميله السكه من غيرَك
* * *
جميل الحب من غيرَك
وأصل الحب..
فى زهره جميله برّيّه ..
تعيش بالشمس والميّه..
رويتها بدمّى ودموعى
وخوف م الريح ..

فى جوّه القلب خبيتها
وكان ردّك..
منعت الشمس عن بيتها ..
وجيت بايديك تفتتها
وكان همّك فى قطف الزهره توهمها :
"بتوهبها لحياه أجمل" بتعبيرَك
جميل الحب من غيرَك ..

وصدقنى ..جميله حياتى من غيرَك