لوحه مرسومه

اللوحه مرسومه وْكما مرايه لعنيك..

مع إن غيرها بتتقرا..

فاكرين فؤادك راح يموت على دنيته

مع إنه مات من غدرها

الكل حاسس فيك رجوع..

والحس سابك من زمان ؟

ماشى وْماضيك في يمين إيديك..

يمنع عنيك تحلم بفجر

أمّا الشمال بتدارى عنهم..

خوف بيرعش في الوجود..

لتخطىّ يومك أو تعدّى على الحدود

وعنيك بتهرب م العيون

شايفينها نيل..

والطير بيرقص ع الضفاف

ما شافوش بعيد..

كان يلمحوا ف عينك جفاف

وقدرت تخدعهم سنين ؟

يمكن ببسمه وْوقفه صلبه لجبهتك

وانت اللى مقتول من إيديهم..

ضحكه عاليه لدمعتك ؟ !

وحاولت تجرى بْقلبك الأبيض وتلجأ للجنون

لكن الجنون يقفل في وشك ألف باب

ولا حتى قادر يوم بعقل الناس تعيش

عايش بتندم في الحياه على غلطتين

أول غلط شدّك خضار عودك إليه

والتاني تمنع روحك المشتاقه ليه

قبل الوقوع بدقيقه فيه

وجريت بتنده..

حلم سافر في الربوع من غير رجوع

* * * *

اللوحه مرسومه وْكما مرايه لْعنيك

أقدم وأجمل لوحه عندك..

دارى لوحتك بالستاره ْوهدّها

تقدر في يوم على وأدها..

2001

shaymaahafez2006@yahoo.com

¨ نُشرت فى جريدة العروبة السنة 14 العدد 719 ، 20 رمضان 1428 هـ .